Kalê Mi
Ma bi xêr dî,
Pîrê mi
Kalê mino herdîşsipê
Werte ra heştay û ju serrî vêrdî ra
Ma hona cayê mezela to nêzanîme
Bêbext û xayinan ra veng nêvecîno
Pêroyîne xo no re kerrênî û lalenî...
Pîrê mi
Kalê mino herdîşsipî
Naye rind bizane
Destê ma hertim pêsîrê mixenetî der o
Hen rehet-rehet ranêvirdanîme
Ma kî raya pîrê xo Sêyîd Rizayî der îme
Ma kî na rayê de zê to sareyê xo danîme
La dişmen ver de sareyê xo ronênanîme
Pîrê mi
Kalê mino herdîşsipî
Tornanê to kî verba zilumî de
Vengê xo kerdo berz
Û seba kamîya xo
Seba welatê xo
Û seba zonê xo
Dişmen de ceng der îme
Pîrê mi
Kalê mino herdîşsipî
Ma bi nameyê to
Ma bi axîna to
Wad kerdo
Û sond werdo
Ma do rojê welatê xo azad kerîme
Wusênê Gestemerde
Berlîn, 15.11.2018
Şîye şîye ax liminê şîye
Zerrya mi gurete xo de şîye
Zê gujgeleka vayî dota amê
Toz û wele fîştê ra asmên
Roştîya çimanê mi ver bîye vîndî şîye
Tiketika zerrya min a
Kezeba mi to ser recefîna
Kam vano çi wa vacêro
Dost û dişmen re înat
Ti hesreta canê min a
Şîye şîye ax liminê şîye
Zerrya mi gurete xo de şîye
Zê perê qazqulingan
Kewtê xişmê vayî ver
Puk û pukeleka vay de şîye
Verê çêberê çê pîyê to de robaro
Şêmuga çêberî ser nişta ro ez bêsitaro
Qudimê mi ti vanê şîkîyo
Ez naca bê to ûstîxwar o
Mi emşo hewnê xo de dîye
Dest kerd porê mi ra, lew na sirota mi ra
Zê milaketa şewa tarîye
Bêven û bêvac bîye vindî şîye
Ti vanê ez ez nîya
Ez xo de şîya
Zê kerr û boman a
Hêş û aqil nêmendo
Ti vanê ez sêyê verê dês û duwaran a
Şîye şîye ax liminê şîye
Zerrya mi gurete xo de şîye
Zê buliskê wusarî, zerê mi de şirqê
Dej û hêş kerd can û cigeranê mi
Hesreta xo mi rê kerde hezar hesrete û şîye
Wusênê Gestemerde
Berlin, 30.03.2005