Şahîya Kulturê Kirmancan a 9

Serra 20 îna Înstîtutê Ziwan û Kulturê Kirmancî bicoş amê fîraznayenê.

Înstîtutê Ziwan û Kulturê Kirmancî roja şeme (15.10.2022) edi Cemxaneyê Berlin de Şayîya Kulturê
Kirmancan a 7 îne û serra 20 îna Înstîtutê Ziwan û Kulturê Kirmancî bicoş û serkewte fîraznê.
Programê Şayîya Kulturê Kirmancan seate 18:00 de bi moderatorîya Pinar û Îmam Özgülî dest pêkerd.

Destpêkerdena programî de Pinar û Îmamî xêr amayenê dê meymanan. Dima mamoste Lerzan Jandîl bi nameyê Înstîtutî derheqê înstitutî, kar û xebatê ê ser o qesey kerd.
Goreyê rêza programî hunermendo hêca Soner Soyerî sahne de cayê xo guret û bi vengê xo yê rengin çend lawukî vatî û programê xo bi çepikanê meymanan serkewte xelesna.
Program bi filmê „2001 ra hetanî 2022 kar û xizmetê Înstîtutî“ dewam kerd. Film o ke hetê Wusênê Gestemerde û Aydin Bîngolî ra ameyî bî amade kerdene, hetê meymanan ra bi eleqe û bi baldarî ame temaşe kerdene. Peynîya film de Aydin Bingolî derheqê nê film de kilmek qesey kerd û derbarê kar û xebatên înstîtutî yê vereroje de malumatî dayî.
Şayîya Kulturê Kirmancan bi veng û rengê şîîranê kirmanckî dewam kerd. Wendîşê şîîran ra ver Wusênê Gestemerde, serra 20 îna Înstîtutî fîraznê û pêro kedkaran û endamanên Înstîtutî re sipasîya xo vate. Dima bi sernameyê „Welatê ma bêkes o“ û „Aaax domanê welatê mi“ di şîîrê xo wendî.

Mabenê program de Îdarekerdoxanê Înstîtutî seba projekta „Mektebanê Berlin de dersa
kirmanckî“ Birêz Gökhan Akgün (GEW Berlin) bi yew plakete û mamoste Haydar Deniz kî bi jew sipasname onure kerdî.
Bîne ra dima programê şayîye bi hunermendê hêcayî Burhan Karakaşî dewam kerd. Hunermendo hêca Burhan bi hunermendo hêca Huseyin Karakaşî vejîya sahne û înan hem serra 20 îna Înstîtutî fîraznê û hemî kî pîya lawukê xo vatî.

Na şayîye de şîîranê kirmanckî kî cayê de muhîm guret. Şaîro hêca Îbrahîmê Xaşxaşe bi şîîranê xo yê rengin û bi vengê xo yê nerm û zelalî çend şîîrê xo wendî.
Seba ke emser serra 20 îna Înstîtutî amê fîraz kerdenê, îdarekerdoxanê Înstîtutî kesên ke awankerdoxê înstîtutî yê û wareyê ziwan û kulturê kirmancan de xeylê xizmetanê hecayan kerda bi plakete onure kerdî. Birêzanê plaketan ra; nuştox Munzur Çemî hetê serekê Înstîtuti Îbrahîmê Xaşxaşe ra, plaketê mamoste Lerzan Jandîlî hetê îdarekerdoxa Înstîtutî Mukaddese ra, plaketê
mamoste Aydin Bingolî hetê îdarekerdoxa Înstîtutî Bîlgîye ra û plaketê mamoste Çeko Kocadagî kî, seba ke o şayîye de amade nêbî, bi nameyê êyî Alîsebir Kerîmoglu hetê îdarekerdoxê Înstîtutî Wusênê Gestemerde ra ame dayene. Oncîya îdadarekerdoxanê Înstîtutî her yew endamê Înstîtutî bi yew sipasname onure kerdî. Programê Şayîya Kulturê Kirmancan bi hunermanda hêcaye Sakîna Teyna dewam kerd û
hunermenda hêcaye bi vengê xo yê zelalî lehçeyanê kirmanckî, kirdaskî û sorankî ra lawukî vatî.
Silayîbîyayeyanê ma yê hêcayan mîyan de serekê Cemxaneyî Dr. Yüksel Özdemir, Dr. Asiye Atakan-Şenkaya, Melinda Özgül (Îdarekerdoxa BDAS ya Almanya), Sinem Gül (Îdarekerdoxa BDAS ya Berlinî), Ferat Koçak (Die Linke), Sevim Aydin (SPD), Mehmet Şeker, Taner Akyol, Halit Çelik, Hozan Aydin, Îsmail Erol, Hüseyin Güneşî cayê xo guret bî. Oncîya xêyle nas,dost,
siponsorê mayê hêcayî û qasê 300-400 mordem bêşdarê şayîye bî.
Her çiqas ke Hakan Taş, Hakan Demir û Pascal Meiser ma mîyan de nêbî kî bi mesajanê xo yê hêcayan desteg da şayîye.

Şayîya Kulturê Kirmancan a 7 îne bicoş û bikeyf hêtanî seate 23.00 dewam kerd.
Berlin, 18.10.2022