Şahîya Kulturê Kirmancan a 8. bi coş derbaz bîye.

Şahîya Kulturê Kirmancan a ke her serre hetê Înstîtutê Ziwan û Kulturê Kirmancî ra organîze bena, emserr kî bi serkewte derbaz bîye.

Şahîya Înstîtutê Ziwan û Kulturê Kirmancî emserr Cemxane yê Berlin de, saete 18:30 de bi qese kerdena Serekê Înstîtutî Lerzan Jandilî dest pêkerd. Mamoste Lerzanî dest pêkerdena qese kerdena xo de avankerdox û endamanê Înstîtutî ra tarixnas û nustoxo hêca Munzur Çem û kedkarê Înstîtutî Daîmî Bektaş yad kerdî.
Mamosteyî, kar û xizmeta ke bi nameyê Înstîtutî hetanî nika ama kerdene bi kilmek ardê ra ziwan.
Şahîye bi hunermendê hêcayî Delîl Xidirî berdewam kerd. Hunermendê hêcayî bi vengê xo, bi tenbûrê xo lawukê xo yê kederinî bi sewdaya nerme û weşe vatî.

Bi tenbûr pirodayena hunermend Delîl Xidirî, Wusênê Gestemerde kî serêde avankerdoxanê Înstîtutî ra tarixnas û nustoxo hêca Munzur Çem bi hurmet yad kerd û bi rengê vengê xo di-hîre şîîrê xo wendî.
Bine ra dima hunermenda hêcaye Gulê Mayera vejîyê sahne û bi veng û sewda xo ya zelale û bi tenbûrê xo lawukê xo vatî. Hunermenda hêcayê programê xo yê sahne de ca da hunermendanê zê Mavîş Güneşer, Soner Soyer, Hüseyin Güneş û Pinar Özgüle.
Na rêza vatîşê lawukanê hunermendan ra dima şaîro hêca Îbrahîmê Xaşxaşe vejîya sahne. Şaîrî bi tamê rengê kirmanckî şîîrê xo wendî.
Peynîya Şahîya Kulturê Kirmancan de hunermenda hêcayê Gulê Mayera bi suprîzê xo û bi coş lawukê govende vatî û şahîye bi govende xelesîye.

Înstîtutê Ziwan û Kulturê Kirmancî – Berlin