Şahîya Kulturê Kirmancan a 9. bi coş derbaz bîye.

Şahîya Kulturê Kirmancan a ke her serre hetê Înstîtutê Ziwan û Kulturê Kirmancî ra organîze bena, emserrî kî bi serkewte û bi coş derbaz bîye. Programê Şahîya Kulturê Kirmancan bi moderatorîya Soner Soyerî saete 19:15 de dest pêkerd.
Dest pêkerdene de Sonerî bi reng û vengê kirmanckî, kirdaskî, almankî û tirkî xêr amayenê dê meymanan û dima serekê Înstîtutê Ziwan û Kulturê Kirmancî Sêyîtalî Dikmen dawetê ser sahne kerd. Serekê Înstîtutî dest pêkerdena qese kerdena xo de avankerdox û kedkaranê Înstîtutî ra kekê Munzur Çem û Daîmî Bektaş bi hurmet yad kerdî. Dewamê qese kerdena xo de muhumîya ziwan û kulturê ma, kar û xizmeta Înstîtutî ser o derga derg qese kerd.
Qese kerdena serekê Înstîtutî ra dime mamoste Haydar Deniz kî çend serrî yo ke mekteba Otto-Wels-Grundschule-Berlin de dersa kirmanckî dano, mamoste kî no husisê dersa kirmanckî û wendekaranê xo de qese kerd û malumatî dayî. Na qese kerdene ra dima Sonerî bi wendîşê jû şîîre (şîîra W. G) Îdarekerdoxanê Înstîtutî ra Wusênê Gestemerde dawetê ser sahne kerd û êy kî destpê kerdena qese kerdena xo de avankerdox û kedkaranê Înstîtutî ra kekê Munzur Çem û Daîmî Bektaş bi hurmet yad kerdî. Derheqê Şahîyanê Kulturê Kirmancan de kilmek qese kerd û vîdeoyo ke derheqê Şahîyanê Kulturê Kirmancan de kerd bî amade, hetê meymanan ra amê temaşe kerdene.
Dima hunermendo hêca Hüseyin Güneş sahne gurete, bi veng û rengê lawukanê xo yê kirmanckî reng da Şahîya Kulturê Kirmancan. Da vîste deqa bîne ra dima, Soner Soyerî bi wendîşê şîîra şaîrê hêcayî Îbrahîmê Xaşxaşe dest bi qisimê di-deyîne kerd. Endamê Înstîtutê hêcayî Pinar û Îmam Özgül, seba ke kar de bî û nêşîkîyê berê şahîye, înan kî bi mesajê xo, bi şîîra xo û bi destegê xo reng da şahîye.
Kedkarê ziwanê kirmanckî, şaîîr û nustox o hêca Qemer Soylemez kî şahîye de cayê xo guret bî. Kedkarê kirmanckî Soylemezî kilmek qese kerd û jû şîîra xo wende.
Şahîya Kulturê Kirmancan bi coş dewam kerd û bi çepikan hunermenda hêcayê Lale Koçgün û hunermendo hêca Yasînî pîya vejîyayî sahne. Hunermenda delale bi rengê vengê xo, bi tenbûrê xo xêyle eserê kirmanckî û kirdaskî vatî. Her çiqas ke Lale Koçgüne xêyle eserê hewlî vatî û programê xo xelesna kî bi çepikanê miletî rêyna sahne gurete û bi lawuka xo ya pêyene programê xo qedêna.
Moderatorê şahîyê Soner Soyerî, pêynîya progremê şahîye de bi nameyê Înstîtutê Ziwan û Kulturê Kirmancî meymanan re, hunermenda pêroyîne re sipasîye kerde. Peynîya Şahîya Kulturê Kirmancan de serekê Înstîtutî Seyîtalî Dikmen, Mukaddes Dede-Aslan, Wusênê Gestemerde û Îbrahîmê Xaşxaşe her do jû, jû destê gûlan taktîme hunermendanê şahîye kerd.
Şahîya Kulturê Kirmancan zê her serre emserr kî bi coş, bi veng û rengê kirmanckî, bi serkewte derbaz bîye.
Hîre serrîyo ke têdima Îdarekerdoxê Cemxaneyî çêberê Cemxaneyî ma re kerdê ra û ca danê ma, ma kî taybetî serekê Cemxaneyî Dr. Yüksel Özdemir û pêro îdarekerdoxanê Cemxaneyî re zaf sipas kenîme.
Oncîya seba ke şahîya ma de ca guret û ma onire kerdîme Îdarekerdoxanê Cematê Dêrsim re, Îdarekerdoxanê Erzincan / Kücükotlukbeli Dernegi Berlin e. V. re û pêro dezgeh û komelan re, nas, dost û hevalan pêroyîne re zaf sipas kenîme.
Not: na şahîya ma, bi ked, bi fedekarîye, bi hetkarîya Îdarekerdoxan û endamanê Înstîtutê Ziwan û Kulturê Kirmancî reştê armancê xo.
Berlin, 24.11.2024
Înstîtutê Ziwan û Kulturê Kirmancî (Zaza) -IKK- e. V.