Bîyografîyê Îbrahîmê Xaşxaşe
Îbrahîmê Xaşxaşe, sera 1961 de dewa Gimgimî Xaşxaşe de amo dînya. Mektebo verên dewa xo de, mektebo berz Gimgim de wend.
Tirkîya de jû dezgeyê wezîratîya edeletî de, 12 serî zê memurî xebetîya. 1988 de îmtîhanê “Fakûlteya perwerdeyê rakerdî ya Anatolî“(Anadolu Açık Öğretim Fakültesi) yê çar serinî qezenc kerde. Hetê ra wend, hete ra xebetîya.
Sera 1996 de tayê sebeban ra şî ewrupa. A rojê ra nat dîaspora de cuyê xo dewam keno. Cîya, cîya dezgeyanê kulturî de xebetîya. Ne seranê peyenan de, “Înstîtutê Ziwan Û Kulturê Kirmancî (Zaza) IKK e.V. Berlin” î de gege zê serekê însîtutî, gege zê îdare kerdoxê Însîtutî, gege kî zê namzetê înstîtutî aktîf xebetîya. Xebatê xo honakî berdewam keno.
Îbrahîmê Xaşxaşe 2008î ra nat, hetê ra jû fîrma de xebetîno, hetê ra înstîtutî de xizmeta zon û kulturê kirmanckî/zazakî keno, heto bîn ra kî bi kirmanckî şîîr û maqaleyan nîvîsneno. Şîîr û maqaleyê Îbrahîmê Xaşxaşe kovar û rojnameyanê, Zûlfîkar, Semah, Bezuwar, Vate, Rojname Newe Pele û medya sosyale de,kêyê peleganê edebîyatî zê Dêrsîm înfo yîde ca guret-neşr bî.
Eserê Îbrahîmê Xaşxaşe di dîvananê şîîran de ki ca guret.
1. Despêk ra heta ewro Antolojîyê şîîranê zazakî. Harûn Bozkurt
2. Bi nuskar û şaîranê xo Gimgim. (Yazarlarıyla şairleriyle Varto). Şerif Fırat
Eserê êyê kê hetanî nika weşanîyê, nê yê:
1. Aşma Zerde (kitabê şîîre): Veşanxaneyê Fam î, çapê jûyîne mart 2020.
2. Azad (kitabê şîîre): Veşanxaneyê Vateyî, çapê jûyîne Îstanbul, 2023.
Xelatê ke guretê:
1. Çalakîya edebîyatê Hûseyin Çelebî ya sera 2014îne de, şîîra “Xwezîla” xelate gurete.
2. Çalakîya edebîyatê Hûseyin Çelebî ya sera 2017îne de, şîîra “Kewe” xelate gurete.
3. Musabeqaya hîkaye û şîîranê kirmanckî yê kovara Vateyî ya sera 2020 îde, şîîra „Çimkewkine“ xelate gurete.