Şahîya Kulturê Kirmancan a 5

Şahîya Kulturê Kirmancan a 5

Înstîtutê Ziwan û Kulturê Kirmancan (ÎKK) o ke Berlîn der o, sey her serre emserr kî ancîya panel û
Şahîya Kulturê Kirmancan organîze kerde.

Şahîya Kulturê Kirmancan a 5îna ke hetê komîteya Înstîtutî ra amebî organîzekerdene, hîrê rojî dewam kerd. Nê hîrê rojanê kulturî ra roja enîye, 16.11.2018 bi panelan dest pêkerd. Bi pêşkêşkerdena Pinar Ozgule programî saeta 19:30 de dest pêkerd. Dest pêkerdena nê panelî de
Pîr Sey Riza serrgêra 81îne de bi hurmet ame yadkerdene. O ra dime panelîstan sahne de cayê xo girewt û “Dêrsim 37-38” ser o hîra-hîra qese kerd. Panelîstan mîyan de cigêrayox û nuştox Munzur
Çem, sosyolog Îsmaîl Beşîkçî, cigêrayox û tarîxnas Mehmet Bayrak û Cahît Munzur bî. Serekê enstîtu, Lerzan Jandil, moderatorîye kerde.

Roja dîyine, 17.11.2018 de, konser estbî. Hunermendanê sey Beser Şahîn û Pinar û Îmam Ozgulî hunerê xo pêşkêşê meymanan kerd. Roja hîrêyine, 18.11.2018 de, şahîye bi tîyatro dewam kerd.
Bi pêşkeşkerdena Pinar Ozgul û Wusênê Gestemerdeyî ra, programî saeta 15:30 de dest pêkerd.
Kaybazê tîyatroyê kirmanckî Arêyê Kayî vejîyayî sahne û kayê xo kay kerd. Program bi mîkrofono rakerde û werdê Kirmancîye qedîya.

Goreyê viraştoxanê şahîye, her hîrê rojî bi eleqeyêda zaf rinde vêrdî ra. Endamê ÎKK Wusênê Gestemerdeyî naye ser o va “Hetê miletê ma ra raşta kî alaqeyêda zaf rinde bîye û xeylê kesî
beşdarê nê hîrê rojanê kulturî bîyî. Şahîya Kulturê Kirmancan ebe rengê zonê kirmanckî û ebe rengê muzikê kirmanckî vêrde ra. Kirmancan kî ebe na wesîle şahîyêda zaf rind û delale derbaz
kerde.”

Wusênê Gestemerde
Berlin, 20.11.2018