DAKİLA GULSÎMA

Sera 1966 de têna hard nêlerzaybî
Tivatêne asmêno kewê kî demdîyay bî Gimgimî ser.
Firqanê zaw û zêçan, teyr û turan o ke kewtî bî têmîyan
Erş û êla qulê kerdêne çimê rojê de.
Ê mahşerî de binê banî de,
To bi a dixazkanîya xo
Lajê xo yo rakewtê guret ke bivejîyê teber.
Lê, hardlerzî zê hazaran qurbananê xo
Gama to ya peyênen de, şemiga çeberê teberî de lamê nê re to ser.

Tam kî a dem,
Kemer û kuçê desan pêser, pêser
Bî zê ejderhayê de harî û ramit re to ser.

A hayleme de to nata-bota xil da
Çi hêf ke pençeyanê ê ra ranêxelesîya.
Tefûdumax hetê de
Lê, sala betoşkeyîna ke demdîyay bî re serê to ser
To miqerem kerdîbî, hesîr guretî bî.
Hîsê Mayê Asîye
Ti bîya qertalê de xeşîm, lajê xo sera perrê xo ardî re pêser
“ Ya Xizirê roja tengê carê ma resê…” venga wayîr î da
û xover da.
Sahatan ra dima vengê amê
Hama a gamê,
to bi hîssanê mayê

“ Damîş be berxê mi, carê ma de wayîr ame “ vat
û teqatê de lajê xo.
Hêya, ti û derguşa pîzê xo xelesîyay bî ra
Çi hef ke lajê to damîş nebî bî, tam kî demê raxelesîyayîne de
Qefsingê to de zirçay bî, zirçay bî û bajîyay bî.

Oxro ke to seba ê masum û pak î xo eştî bî kila adirî…

Xebera sîyayê rew amene
Jan janî ser de ramitene re to ser
Tinevana çêna to ya ponc sereyê kî bine banê cîrane to de pelaqajîyay bî.
Ti ke pêhesîya
Qudimê to xelesîya û cîgera to ra çîyê visiya.!
Koyê Bîngolî ra têf û dumax,
Lê bananê rijiyayînan ra kî helmê merdene darîyêne we.
Êman , êman çi zulûm, çi zulûm.

Çi hîkmeta nêzanîno, bêvengîya xo zaf nêont bî…!

a tramvaya xo ya xederê mîyan de, bîyê pola û waştê ra payan ser.
Bi çimanê xo yê qefelîyayînan veren de Asmenî de
Dima kî deşta Gimgimî de nîya da
Dolimena leşê domananê xo maçî kerdî
Serê berz hama bi vengê de berzî
“ Hardlerzo kerfersend
wad bo, wad bo ez ne zulimê to verde kî nênane çokan ser “ vat
beçika xo ra kelê girê boxa yî birna, îqrar da weşîyê û Semah şîye.

Ê esaletê Dakila Gulsîma re,
Dar û ber î kî secde kerd şahîdîya hardê Dewreşî de.
Vanê kê, A rojê ra nat, Rojî ke xeyma xo eştê ra Koyê Bîngolî ser
Tarîtîna şewê de, Dewa Şorikê de nalîna Domanan êna bine hard î ra.
Dewreşîyîne sebir û zanoxîya
Barê xo janê cîgere û kila adirîya
Coka karê herkesî nîya.

De vacê mi ra Dewreşê
Mabêyne hard û asmenî çend gamê
Çi ra asmenî ra xaftila astareyî xijbene
To mîyanê merdîş û weşîyê de çend dolim î dewr çerexna, şîya û ama
Gelo derd û qotikê dînya senê rengê
Ma janê cîgerê..!?
Sirrê xo çiko vacê mi ra
Ti bi sebrê kamcî Dewrêşa efsunkarê
Her waraginayîşê xo de, xo wela xo ra newê de afernayêne ha..!?
Dakila Gulsîma, nêzan ti perîya
Ya kî têyra Sîmurxî ya
Kamçizano
Belku kî ti hem perîya
Hem kî têyra Sîmurxîya
Kamçizano.!!!

Îbrahîmê Xaşxaşe
Dîdîm 08.2018