Gazîya Qedîmî

GAZÎYA QEDÎMÎ

Çitaw ke şîlîye berve,çimanê mi ra laserî şonê
janê de bêfami ver xo bi xo de fatasîna
û neçar neçar birîna xo lêsena.
Her teqayişê buriskî de,
di çimê belekinî qerqezîne çimanê mi verde
Ez bena meftun û alozane xeyalanê xo mîyan de
rêça Qedîmî ramena..!

Xebera sîyaye rew bîbî vila,
“ …de lorî,lorî, dayike bi korî
Ero vanê Qedîm qetl kerdo,
wîî lawo,lawo ez to rê bimirî…”

mi rojêde şîlîyine de,
bi na şîwara maya xo gazîya Qedîmî guretî bî.
A roja sîyaye ra nat, kîlitê tilsimî xerepîyo,
Tamê tarûturî heremîyo û rengê xozayî kî vurîyo.

Dugela ma dergayê ewlîyana,
bêbextîye tometa, usulanê ma de
Coka Koyê Bîngolî, zîndan û kaşî,
Cinawurî, heşî, perperik û mêşî
Sîya guretene derê hona..!
“ Qedîmî xo eştî bî pêşê ma,
lê çi hêf ke ma qerqeşunan ra nêşevekna o “
Vanê û bêbextîna xo sebeb ra zirçêne û zirçêne.

Dîksilêmanî ke perskêna, amo pêser û naleno
Pepug kî kewto kuncikê û ma rê waneno.
Ne çuçikî bi eşq vîçnenê, ne kî qazqulingî û zerancî qaqnenê
Lulikê adirî kî bîyê lal û kilaman nêvanê êdî,
Çimke ê kî gunekarê, ê kî neyarê..!

Kulanê mi, ker gurewto qefsingê mi de
Kamaxan ke ziqitna bêwaxt,
Huyayişê Qedîmîyo gulin êno mi vîrî,
Tinazê ê êna mi vîrî.
“ Ti şahîda Dala Zerî,
Îbê mi xebetîno bêzerî
Xebat to ra nêno suslîyê mi,
Ti hona lajê daka domanê vizerî…” vatêne mi ra.

Hêya,hêya. Ê lex û luqê ma, axê ma
Xem û xeyalê ma, pêro kî bî şanikî.

Axx to bîrîna mina gêje, derdo bêderman û
Dejê mino hovî,
ma şima heyanî çitaw mi nîya koçêne ha..!

Ey axwa çirî, çilkanîya sipîye, girê boxa
Henî bêveng mevinderê, ju klamê bilornêne mi rê
Wa boya Qedîmî bêrone ci ra ma sebeno.

Bîrîna mi,
morê bêbextîya, gonî beldana minit kî,
Ne toxtorî fam kenê cira,
ne kî ewlîyayî çarê vînenê.

Ya wayirê hard û asmênî…!
Ti çitaw nurê xo musnena ma
û heşnena firqanê mi..?
Êdî beso..!
Şîlîye mebervo, burisk meteqo
Ne dejê cîgere bidilopîyo ruxê ma ser
Ne kî, afata nîya bêfame bêro qomî ser
Durî şoro,durî şoro.

Îbrahîmê Xaşxaşe
Berlîn. 20OO.