Şahîye Kulturê Kirmancan ya hîrêyine roja 05.05.2017 de Werkstatt der Kulturen de virazîye. Hunermendên meymanî yên na şahîya ma de hunermendê ma Hasan Alî, Pinare û Îmamî bî. Heskerdoxanê Kirmanckî, Dost û hevalanên Înstîtutê Ziwan û Kulturê Kirmancî (Zaza) –IKK- e. V. yî amayî na şahîya ma, ma tenya nêverdayîme. Şahîya ma de hîrisê kesan ra zêdêrî mordemî ama de bî. Seba cangorîyanê Kirmancîye û dinya deqê payî ra vindetene ra dime bi qesê kerdena serekê Înstîtutî Lerzan Jandîlî şahîya ma dest kerd ci. Verde Pinar û Îmamî sahne de cayê xo girewt. Pinar û Îmamî rêya verêne şahîya Înstîtutî de ca girewtene û performansêde rind musna û bi lawikanên xo yên Kirmanckî zerîya bela nîyadoxan de cayê xo girewt. Bine ra dime, parçeyê diyîne yê şahîya ma de hunermendê ma Hasan Alî teba grupa xo amê sahne. Nîyadoxan bi lawikanên Hesen Alî yên weş û delalan demêde rindek derbaz kerd. Pêynîya şahîye de Pinar û Îmamî rêyêna amayî sahne, teba Hasan Alî nîyadoxan rê çend lawikên bînî vatî. Şahîya ma bi serkewtiş vêrde ra. Înstîtutê Ziwan û Kulturê Kirmancî (Zaza) –IKK- e. V. yî hunermendanên ma Hasan Alî, Pinar û Îmamî rê spas keno, ci rê serkewtene wazeno. Înstîtutê Ziwan û Kulturê Kirmancî (Zaza) -IKK- e. V. seba amade kerdena na şahîye endamanên xo rê, nas û dostanên xo rê spas keno. Tenya bi hetkarîya şima endaman, dost û hevalan ma şîkînîme şahîyanên nîyanênan bikerîme, bi naye kî re kultur û zonê xo wayir bivejîme û xizmeta zon û kulturê xo bikerîme. Rind ke şima est ê. Înstîtutê Ziwan û Kulturê Kirmancî (Zaza) –IKK- e. V.